Azərbaycanlı milli-mədəni fəal, Əhər sakini Əkbər Cahangiri Kəleybər şəhərinin İnqilab Məhkəməsinə çağırılıb.
Fəal çağırış vərəqəsini təhvil aldıqdan sonra 5 gün ərzində məhkəməyə müraciət etməlidir.
Əkbər Cahangiri iyunun 30-da Güney Azərbaycanın Kəleybər şəhəri yaxınlığında yerləşən Babək qalasında (Bəzz qalası) keçirilən yığıncaqda iştirak etdiyinə görə, daha bir neçə fəalla birlikdə saxlanılmışdır. Fəallar döyülərək yaxalandıqdan sonra Təbriz İslam inqilabı Keşikçilər Korpusunun (“Sepah”) təcridxanası, sonra isə Əhər zindanına intiqal edilmişdir. 8 gün saxlandıqdan sonra Əhər zindanından zəmanətə buraxılan fəallar, sistemin əleyhinə təbliğ və ictimaiyyəti təşvişə salmaq ittihamı ilə üzləşib. Ə.Cahangiri həmin dosye ilə əlaqədar məhkəməyə çağırılıb.
Adını çəkdiyimiz fəal bundan öncə də Azərbaycan türk millətinin milli və demokratik hüquqları uğrunda apardığı mədəni mübarizəyə görə dəfələrlə təhlükəsizlik qüvvələri tərəfindən saxlanılıb və müxtəlif təzyiqlərə məruz qalıb.