Güney Azərbaycandakı Erməni apostol kilsəsinin Atrpatakan yeparxiyasının rəhbəri erməni icmasını prezident seçkilərində fəal iştirak etməyə çağırıb.
Qurum Güney Azərbaycanda məskunlaşan erməniləri prezident və İslami şəhər və kənd şuralarına keçiriləcək seçkilərdə mütəşəkkil qaydada və vahid mövqedən bir şəkildə iştirak etməyə dəvət edib.
“Azərbaycanda yaşayan erməniləri, erməni təşkilat və dərnəklərini seçkilərdə aktiv iştirak etməyə və bu vasitə ilə birliyimizi dünya ictimaiyyətinə nümayiş etdirməyə səsləyirik”-deyə, çağırışda qeyd olunur.
“Seçkilərdə aktiv iştirak etmək Xomeyni dəyərlərinə sadiqliyimizi bir daha sübut edəcək”-Erməni apostol kilsəsinin Atrpatakan yeparxiyasının rəhbəri Qriqor Çiftçiyan adından yayınlanan çağırışda deyilir.
Seçkidə fəallıq bu hər bir erməninin vəzifəsi adlandırılır.
Qeyd edək ki, son 42 ildə İran İslam Respublikasının zindanlarında edam edilmiş bir sıra siyasi məhbusların və 2019-cu ilin noyabr ayında benzinin bahalaşmasına qarşı keçirilən kütləvi etirazlarda rejim qüvvələri tərəfindən qətlə yetirilən dinc aksiyaçıların ailə üzvləri ölkə vətəndaşlarını prezident seçkilərini boykot etməyə çağırıb.
İranın 25 əyalətinin 50 şəhərindən olan 231 siyasi-mədəni fəal da mayın 17-də xalqı boykota səsləyib.
Bəyanatda bildirilir ki, diktator və səriştəsiz “Vəliyyi-fəqih” rejiminin repressiyalarının qurbanı olmuş ölkə əhalisi dinc yollarla korrupsioner islam respublikasından azad və demokratik bir hakimiyyətə keçmək üçün qarşıdan gələn prezident seçkiləri şousunu boykot etməlidir.
Eyni halda İranın keçmiş prezidenti Mahmud Əhmədinejad da daxil olmaqla, İran hökumətində yüksək vəzifə tutan bir sıra şəxslər də xalqı seçkiləri boykot etməyə səsləyiblər.
Gunaz.tv.
1695