Güney Azərbaycanın Urmiyə şəhərinin İran paralamentindəki millət vəkili Xoy şəhərinin Şorik kəndində baş verən yanğın hadisəsi barədə “Nedaye Urmiyə” xəbər agentliyinə danışıb.
Hadisə qurbanlarının yaxınlarına başsağlığı verən millət vəkili Qərbi Azərbaycanda yetəri qədər tibbi avadanlıq və imkanların olmadığından şikayətlənib. “Şorik kəndində qaz balonunun partlaması nəticəsindən baş verən yanğın, çox acı bir hadi hadisə idi və hər kəsi kədərləndirdi. Tibbi avadanlıq və imkanların məhdud olduğu üçün hadisədə xəsarət alanların bir neçəsi Tehran və İsfahana köçürüldü. Bütün bunlar göstərir ki, Qərbi Azərbaycanda xüsusi yanıq xəstəxanasına ehiyac var. Biz bunu dəfələrlə tələb etmişik, lakin tələbimiz təmin edilməyib”- deyə millət vəkili vurğulayıb.
Nadir Qazipur sözügedən xəstəxananın tikilməməsini vəsaitin olmaması ilə əlaqələndirib. O bildirib ki, “Tehran həkimlərinin bütün tələblərini ödəmək üçün kifayət qədər pul var, ama Qərbi Azərbaycanda xəstəxana tikmək üçün pul yoxdur. Belə məsələlərə görə, səhiyyə sahəsində problemlər öz həllini tapmır.”
Xatırladaq ki, hadisə iyunun 29-u axşam saatlarında Xoy şəhərinin yaxınlığındakı Şorik kəndində baş verib. Kənd evlərindən birində qaz balonundan qazın sızması nəticəsində partlayış əmələ gəlib və evin 4 sakini ağır yaralanıb. Hadisədən az sonra yaralıların yardımına gələn kənd sakinləri, evə daxil olarkən yenidən partlayış olub. İkinci partlayışda isə daha 20 nəfər müxtəlif xəsarət alıb. Hazırda hadisədən ölənlərin sayı 12 nəfərə çatıb.
İstinad: GünAz TV
1544