Ərdəbil əyalətindəki zindanların baş idarəsinin rəhbəri Murad Fəthi iyunun 14-də jurnalistlərlə görüşündə əyalət zindanlarının tutumunun məhdudluğundan və məhbusların sayının gündən-günə artmasından danışıb.
Murad Fəthi deyib ki, Ərdəbil əyalətinin zindanlarında saxlanılan məhbusların sayı, həbsxanaların tutumundan 4 dəfə çoxdur: “Əyalətdə məhbusların zindanlara düşməsinin əsas səbəbi iqtisadi, mədəni və məişət məsələləri ilə əlaqədardır. Araşdırmalar göstərir ki, son vaxtlar maliyyə məsələlərinə görə həbs cəzası alanların sayı 27 faiz artıb. Hazırda isə əyalət həbsxanalarında 467 məhbus həmin məsələyə görə həbsdə saxlanılır.
Bundan başqa, əyalət zindanlarında saxlanılan məhbusların əksəriyyətinin ittihamı narkotik maddələrlə əlaqədardır. Həbsxanaların qadın məhbuslarına məxsus bölmələrində saxlanılan məhbuslar isə ilk növbədə narkotik qaçaqmalçılığı, daha sonra isə gündəlik məişət zəminindəki problemlər, o cümlədən də dava-dalaş, qətl və nəhayət əxlaqsızlıq ittihamlarına görə cəza çəkirlər. Bizim mövcud həbsxanaların tutumundan 4 dəfə çox məhbusumuz var. Elə buna görə də hesab edirəm ki, əyalət zindanlarının sayını artırmaq bir zərurətdir”.
İstinad: GünAz TV
1695