GünAz TV: Avqustun 8-də bir qrup tanınmış azərbaycanlı fəal Hüseyn Əli Məhəmmədi və Yürüş (Ayət) Mehrəlibəyli ilə görüşüblər.
Görüş Hüseyn Əli Məhəmmədinin Təbrizin Mərkəzi zindanından yenicə azadlığa buraxılması münasibəti ilə keçirilib.
Fəallar görüş zamanı Azərbaycanın ictimai-siyasi vəziyyəti və həbsxanada olan fəalların durumu ilə bağlı söhbət aparıblar.
Hüseyn Əli Məhəmmədi 3 illik həbs müddətini başa vurduqdan sonra avqustun 6-da Təbriz İnqilab Məhkəməsi tərəfindən sərbəst buraxılıb.
Fəal 2015-ci il martın 1-də Salar Turinin Təbriz yaxınlığında yerləşən iş yerində Ettelaat (İran Kəşfiyyat Nazirliyi) əməkdaşları tərəfindən saxlanılıb. O yaxalanarkən məmurlar tərəfindən şiddətlə döyülmüşdür.
Təbriz İnqilab Məhkəməsinin 3-cü Şöbəsinin rəisi hakim Baqirpur fəalı sistemin əleyhinə təbliğ və rəhbəri təhqir etmək ittihamı ilə 3 il həbs cəzasına məhkum edib, hökm sonralar Şərqi Azərbaycan Apelyasiya Məhkəməsinin 6-ci Şöbəsi tərəfindən təsdiqlənib.
Hüseyn Əli Məhəmmədi açılan dosye ilə əlaqədar 2013-cü il noyabrın 4-də Taha Kirmani ilə birlikdə Təbrizdə yaxalanaraq bu şəhərin Ettelaat İdarəsinə aparılıb. Fəallar müvəqqəti saxlanma müddətində Ettelaat əməkdaşları tərəfindən cismi və ruhi işgəncəyə məruz qalıblar.
Hüseyn Əli Məhəmmədi, Taha Kirmani ilə birlikdə 2014-cü il aprelin 15-də təxminən 6 ay saxlandıqdan sonra mülki vəsiqə qarşılığında Təbrizin mərkəzi zindanından azadlığa buraxılıb.
Azərbaycanlı fəal Yürüş Mehrəlibəyli isə məhkəmənin təyin etdiyi 8 il həbs cəzasının 5 ilini çəkdikdən sonra şərti azadlığa buraxılma qanunundan istifadə edərək 2017-ci il fevralın 17-də sərbəst buraxılıb. 2013-cü il qış aylarında daha 4 fəalla (Mahmud Fəzli, Şəhram Radmehr, Lətif Həsəni və Behbud Qulizadə) birlikdə saxlanılan Yürüş Mehrəlibəyli, sistemin əleyhinə təbliğ və milli təhlükəsizliyi pozmaq məqsədi ilə qanunsuz qrup yaratmaq kimi qondarma ittihamlarla üzləşib.