Ötən günlərdə Təbriz-Məşhəd qatarının İranın Simnan vilayətində qəza keçirməsi çox sayda soydaşımızın ölüm və yaralanmasına səbəb oldu. Hadisə qurbanlarının xatirəsi Güney Azərbaycan şəhərlərində müxtəlif tədbirlərlə yad edilir.
Məlikanda onlarla gənc qız və oğlan Qazanlı məscidinin qarşısına toplaşaraq dəmir yolu qəzasında ölənlərin xatirəsinə şam yandırmaq istəyiblər, lakin polis qüvvələri mədəni fəallara mərasim keçirməyə icazə verməyib.
Şahidlərin verdiyi məlumata görə, polis əməkdaşları məscidin qarşısına toplaşan fəalların avtomobillərinin plaka nömrəsini qeyd etdikdən sonra onları ərazidən uzaqlaşdırıb.
Şahidlərdən biri GünAz TV mətbuat mərkəzinə bildirib ki, polis Mehdi Kuxiyan və Əli Zeynalini yaxalamaq istəyib, lakin ətrafdakı gənclərin müqaviməti nəticəsində bu mümkün olmayıb.
Məlikanlı fəallar dekabrın 1-i yerli vaxtla saat 15:00-da Qazanlı məscidinin qarşısında mərasim keçirməyi planlaşdırmışdır.
Xatırladaq ki, Noyabrın 25-i yerli vaxtla saat 7:45 dəqiqədə Təbriz-Məşhəd qatarı İranın Siman vilayətində ağır qəza keçirib. İran dövlət dəmir yolları idarəsinin diqqətsizliyi nəticəsində baş verən hadisədə ölənlərin sayının həddindən artıq olmasının əsas səbəbi, təcili yardım qruplarının hadisə yerinə gec çatması olub. Hadisədə 49 soydaşımız ölüb, 100-dən çox yaralı var.
BAO.AZ
823