İranda 800-dən artıq türkmən vətəndaş türkmən dilinin tədrisi ilə bağlı ölkə prezidenti Həsən Ruhaniyə açıq məktubla müraciət edib. Məktub mədəni fəal, öyrənci, incəsənət xadimi, mühəndis, həkim, yazıçı, ziyalı və müxtəlif peşə qruplarından ibarət olan 800-dən artıq türkmən vətəndaş tərəfindən imzalanıb.
Açıq məktub Türkmənsəhra bölgəsi millət vəkilləri vasitəsilə prezident H.Ruhaniyə çatdırılıb.
“Herana” xəbər agentliyinin yaydığı məlumata görə, Məktubda türkmənlərə qarşı ayrı-seçkiliyin aradan qaldırılması və türkmən dilinin Türkmənsəhra bölgəsinin məktəblərində (mədrəsə) tədris edilməsi istənilib. Müraciətdə həmçinin yaşadıqları Gülüstan və Xorasan vilayətlərində türkmənlərin yüksək dövlət vəzifələrinə gələ bilmələri üçün maneələrin qaldırılması istənilib.
Bir neçə gün öncə isə türk dilinin ibtidai və orta məktəblərdə tədrisinə dair 42 millət vəkili tərəfindən prezident Həsən Ruhaniyə məktub ünvanlamışdır. Məktubu Güney Azərbaycan, eləcə də Xorasan və Tehran kimi vilayətlərdən olan türk millət vəkilləri tərəfindən imzalanmışdır.
İstinad: GünAz TV